सूचनाको उत्पादन, प्रशोधन, भण्डारण तथा वितरणसम्बन्धी कार्यलाई प्राथमिकता दिने र सूचना आधारित कामको प्रधानता हुने समाजलाई सूचना समाज भनिन्छ ।

सूचनाको उत्पादन तथा वितरण समाज विकासको निर्णायक शक्ति बन्न थालेपछि वर्तमान समाजको अवस्थालाई सूचना समाजका रूपमा व्याख्या गर्न थालिएको हो । यस्तो समाजमा ज्ञान अर्थतन्त्रको मूल तत्त्वका रूपमा रहन्छ र नागरिकहरू बढी सुसूचित हुन्छन् ।

सूचना समाजमा पढ्न, सुन्न तथा हेर्न सकिने विभिन्न ज्ञानवर्धक सूचना सामग्रीको उत्पादन, प्रशोधन तथा वितरणलाई विशेष प्राथमिकता दिइन्छ ।

सूचना समाजको सन्दर्भमा डिजिटल विभेद तथा विद्युतीय उपनिवेशवाद जस्ता सवाल पनि उठेका छन् । सूचना तथा सञ्चार प्रविधिमा बढी पहुँच भएका देश र नागरिकको शक्ति अझ बढ्न सक्छ भने कम पहुँच भएका देश तथा समुदाय पछाडि पर्न सक्छन् ।

यसरी सूचना समाजले अवसर, ज्ञान र सञ्चारको विस्तार गरे पनि प्रविधिमा असमान पहुँचका कारण सामाजिक तथा आर्थिक विभेद बढ्ने सम्भावना पनि रहन्छ ।

बसाइँसराइले ग्रामीण तथा सहरी समुदायको सामाजिक सम्बन्ध, पारिवारिक संरचना, मूल्य-मान्यता, संस्कृति र आर्थिक अवस्थामा प्रत्यक्ष प्रभाव पार्छ ।

बालबालिकाको शिक्षा, स्वास्थ्य सेवा, वृद्ध आमाबुबाको उपचार तथा अन्य सुविधाको खोजीका कारण पनि परिवारहरू सहर वा सहरोन्मुख बस्तीमा बसाइँ सर्ने प्रवृत्ति बढ्दो छ ।

प्रविधिको प्रत्यक्ष प्रभाव दैनिक जीवन तथा समग्र समाजमा पर्दछ । वर्तमान युगमा प्रविधिको प्रयोग अपरिहार्यजस्तै बनेको छ । नयाँ प्रविधिमा पहुँच हुने वा नहुने अवस्थाले शिक्षा, रोजगारी तथा व्यक्तित्व विकासमा ठूलो अन्तर पार्न सक्छ ।

नयाँ प्रविधिको प्रयोगसँगै परिवार, कुल, कुटुम्ब र समाजसँगका सम्बन्धहरू पनि नयाँ ढङ्गबाट संरचित हुँदै गएका छन् । प्रविधिले धेरै क्षेत्रमा सहजता ल्याएको भए पनि मानिसहरूबीच हुने प्रत्यक्ष संवाद र अन्तरक्रिया घटेको देखिन्छ ।

प्रविधिको कारण मानिसहरू आपसमा सजिलै सञ्चार गर्न तथा सामाजिक सञ्जालमा आबद्ध हुन सक्ने भएका छन् । अहिले एकातिर वास्तविक समाज छ भने अर्कोतिर भर्चुअल समाज पनि विकास भएको छ । एउटा व्यक्ति वास्तविक समाज र भर्चुअल सञ्जाल दुवैमा सक्रिय रहने अवस्था पहिलेको समाजमा थिएन ।

प्रविधिको विकाससँगै पारिवारिक सम्बन्ध, सामाजिक सम्बन्ध तथा वैश्विक सम्बन्धमा पनि परिवर्तन आइरहेको छ । यी परिवर्तनहरू सामाजिक रूपान्तरणका महत्त्वपूर्ण आयाम हुन् ।